Albisteak
Hitzarmena izenpetu dugu Tolosako Udalarekin
2012ko api. 2a, 16:34
Joan zen martxoaren 20an Tolosan izandako ekitaldi batean, Badihardugu Elkarteak lankidetza hitzarmena izenpetu zuen Tolosako udalarekin "Euskal Herriko Ahotsak" proiektuan elkarrekin lan egiteko. Datozen 3 urteetan Tolosaldeko hainbat lekukotasun jaso, katalogatu eta sarean zabalduko ditugu, Ahotsak.com webgune honetan, Tolosako herriaren atalean.
Durango: herria errauts
2012ko mar. 30a, 08:54
1937ko martxoaren 31 durangar guztien eta euskal herritar guztien oroimenean izan beharreko eguna dugu. 75 urte dira Francoren aginduz Italiako Aviazione Legionariako hegazkinek Bizkaiko herri hau bonbardatu zutela. Egun beltz hura gureganatzen laguntzen diguten hainbat pasarte ditugu jasota Durango bertako bizilagunen artean.
Koldo Zuazoren azken liburua: "Arabako euskara"
2012ko mar. 28a, 17:34
Koldo Zuazo hizkuntzalariak liburu berria aurkeztu zuen atzo Donostian. Elkar argitaletxearen eskutik "Arabako euskara" liburua argitaratu du. Arabako euskararen ezaugarriak eta historia izan ditu hizpide eta, besteak beste, mendebaleko hizkeren sorgune nagusia Gasteiz izan zela azaldu du, Bizkaia eta Bilbo baino gehiago. Gutxienez, hasierako mendeetan. Elkarrek berak elkarrizketa egin dio eta ETBren webgunean albistearen bideoa ikus dezakegu.
"Aramaioko elkarrizketa bateko 680 aditzetatik 674 indikatibokoak ziren"
2012ko mar. 20a, 16:32
Datu hori eman zuen Txipi Ormaetxea filologo aramaioarrak joan zen ostegunean "Aramaioko aditz-taulak" liburuxka aurkezteko Aramaion bertan egin zen ekitaldian. Liburuskaren aurkezpenaren ostean, Ahotsak.com webgunea ere aurkeztu zitzaien bertaratutako herritarrei.
Ordizian asteazkenak jai egun bihurtu zirenekoa
2012ko mar. 19a, 16:17
Ordiziako azoka antzinakoa da; 500. urteurrena ospatu zuten atzo. Azoka nolakoa zen gogoratu dugu guk ere, Ahotsak-en jasotako testigantzen bidez.
"The Oxford Handbook of Oral History" (Oxford Press, 2011)
2012ko mar. 14a, 19:03
Eskuliburu berria jaso dugu bulegoan: "The Oxford Handbook of Oral History". Azken urteotan ahozko historiaren ikerketak izandako ibilbidea aztertzen du, xehetasun eta sakontasun handiz. Ahozko historiaren bilakaera, teknologia berrien eragina, eta ikerketa eta aurkezpen publikoetan duten erabilera... hainbat alor eta ikuspegitik aztertuta, ahozko ondarearen bilketan eta dibulgazioan dabilen ororentzat gidaliburu bikaina.
Online ikastaroa etnografiaz eta bizitza-historien inguruan
2012ko mar. 13a, 10:47
Asmoz Fundazioak ikerkuntza biografiko-narratiboan sakontzeko trebakuntza tresna praktikoak jasotzeko beharra dagoela sumatu du. Azken urteotan eskaintzen ari den ikastaroei jarraipena emanez, Bizitza historiak: gizarte zientzietan duen erabilera ikastaroa antolatu dute datozen asteotarako. Martxotik maiatzera luzatuko da, 30 orduz, eta online izango da oso-osorik.
10.000 bideo sarean
2012ko mar. 9a, 08:46
Duela 2 urte bota genuen erronka: 10.000 baietz! Eta ordutik hona 6.000 bideo berri igo ditugu webgunera.
Arkeologia eta antropologia hizpide, Legazpin antolatutako mahai-inguruetan
2012ko mar. 7a, 19:46
Burdinola Kultur Elkarteak mahai-inguru interesgarriak antolatu ditu datozen asteetarako. "Arkeologiaren eta antropologiaren ekarpenak gure
historiaren ikerketetan" izenburupean, bi mahai-inguru izango dira martxoan eta apirilean Legazpiko kultur etxean.
Matxitxakoko batailaren 75. urteurrena
2012ko mar. 5a, 16:30
Gaur 75 urte, 1937ko martxoaren 5ean, urperatu eta suntsitu zuen Canarias ontzi frankistak Euzkadiko gobernuko Bou Nabarra gerra-ontzia. Kantauri itsasoko borroka garrantzitsuena izan zen Matxitxako parean izandako hau.
Euskarazko irratiak 80 urte
2012ko ots. 29a, 13:15
Euskarazko irratiaren 80. urteurrena gogoratzeko jardunaldiak egingo dituzte Donostian bihar eta etzi, Koldo Mitxelena kulturgunean. Lehen irratsaioko esatarien artean Amale Arzelus zegoen, zortzi urteko neskatoa, eta omenaldian izango da.
Elgoibarko toponimiaren inguruko lana aurkeztuko da
2012ko ots. 28a, 18:19
Elgoibarko Udalak antolatuta, Elgoibarko mapa toponimikoaren aurkezpena izango da etzi, martxoaren 1ean, osteguna. Elgoibarko Kultur Etxeko hitzaldi gelan izango da, arratsaldeko 19.00etan.
"Dokumentazioa eta ondare bibliografikoaren komunikazioa" argitalpena kaleratu du EHUk
2012ko ots. 26a, 23:02
2010eko apirilean ondarearen inguruko jardunaldi batzuetan hartu genuen parte Leioan, EHUko Kazetaritza Fakultateak antolatutako hitzaldi eta mahai-inguru batzuetan. Orduko jardunaldietan izandako hitzaldi guztiak argitalpen batean bildu ditu Euskal Herriko Unibertsitateak: "Dokumentazioa eta ondare bibliografikoaren komunikazioa". Teresa Agirreazaldegik koordinatutako liburua da.
Zaldibarko euskararen inguruko webgunea
2012ko ots. 26a, 15:43
Duela hamarkada bat, 2002-2003 urte inguruan, Iñaki Gaminde ikerlaria Zaldibarren ibili zen bertako hizkera jasotzen. Ordukoa da "Zaldibar berbarik berba" liburua, Zaldibarko udalak argitaratua. Oraingoan, orduko lana sarean jarri dute, Zaldibar-euskaraz.com webgunean. Bertan ikus daitezke orduan jasotako guztiak: hitzak, kantuak, kantuak, Zaldibarko euskararen ezaugarri linguistikoak, eta abar.
Arabako euskara jasotzeko ahaleginean
2012ko ots. 15a, 17:15
Arabako euskara jasotzeko ahaleginean dihardute azken urteotan Imanol García Uriarte eta Ignacio Carrera Garmendia filologoek. Hainbat lekuko arabar elkarrizketatzeaz gain, han eta hemen sakabanatutako Arabako grabazioak ere bildu dituzte. Bilduma osoa Ahotsak.com-en ikus daiteke, Arabako euskara izeneko proiektuaren baitan.
Etxetik bidalitako emakume eta haurrak
2012ko ots. 13a, 12:47
Gerra garaian, ehunka pertsona kanporatu zituzten euren herrietatik. Gehienak emakumeak, haurrak eta adinekoak. Gipuzkoan Zumaia izan zen jazarpen handiena izan zuen herria. Gaurko egunez, duela 75 urte, ia 300 lagun bota zituzten Zumaiatik.
Ordukoa bai hotza!
2012ko ots. 10a, 15:10
Hotz handia iragarri dute Euskal Herrian azken egunotarako. Batzuek 56ko izoztea ere ekarri dute gogora. Baina... hainbesterako ote? Ahotsak webgunean garai bateko hozte eta izozteen inguruko lekukotasunak aurki daitezke.
"Euskara Bizia" batzordea sortu du Bizkaiko Aldundiak
2012ko ots. 8a, 10:40
Bizkaiko Foru Aldundiko Gobernu Kontseiluak “Euskara Bizia” batzordea sortzea erabaki du, Bizkaiko Lurralde Historikoan euskararen alde lan egiten duten elkarteak laguntzeko eta haien jarduerak koordinatzeko. Batzorde hori kide anitzeko organo aholku-emaile bat izango da eta Bizkaiko Foru Aldundiko Kultura Sailari atxikita egongo da.
Ahotsak-eko testigantzak Zumalakarregi Museoan
2012ko ots. 8a, 10:19
Tomas Zumalakarregi jeneral karlistaren bizileku izan zen etxean dago gaur egun Ormaiztegiko Zumalakarregi Museoa. Bere helburua Euskal Herriko XIX. mendea ezagutzera ematea da. Izan ere, garai horrek gizarte, kultura, ekonomia eta politikari lotutako aldaketa handiak izan zituen eta, gainera, mundu garaikideari hasiera eman zion.
Ahotsak-eko materiala Eibarko arkitekturaren inguruko erakusketa batean
2012ko urt. 20a, 09:54
Gaur arratsaldean bertan irekiko da Eibarko Portalea kultura etxean "Matsarian zerbait gertatzen ari da" izeneko erakusketa. Eibarko Matsaria auzoaren alderdi arkitektonikoaren inguruko erakusketa interaktiboa da eta, tartean, Ahotsak.com webguneko materiala ere ikusgai izango da. reAkt kolektiboak antolatu du, EHU eta Eibarko udalaren laguntzarekin.
