Euskararen historia soziala Elgoibarren
Elgoibarko Udalak eta Badihardugu Euskara Elkarteak euskalgintzaren gerraosteko memoria jaso eta zabaltzeko asmoz abiatutako proiektua. 1955etik 1990era bitartean euskara eta euskal kultura loratzen eta bultzatzen jardun zutenen testigantza jaso eta ezagutarazteko, herriko euskararen historia soziala ezagutzera emateko. Ibilbide horretan asko izan dira euskararen alde lanean jardun dutenak, arlo ezberdinetan: hezkuntzan, euskalduntze-alfabetatzean, komunikabideetan, musika alorrean, antzerkigintzan... Euskararen loraldi horretan zeresana izan zuten hainbat herritarren lekukotasuna jaso, landu eta bistaratu dugu. Badiharduguk egindako elkarrizketez gain, proiektu honetan katalogatu ditugu Pello eta Ion Arrietak Itziar Ajuriari eta Miren eta Maite Vallejori egindako beste zenbait elkarrizketa. Milesker zuen ekarpenagatik!
Testigantza hauek oinarritzat hartiuta, 2023ko abenduan Elgoibarko euskararen historia soziala laburtzen duen ikus-entzunezkoa aurkeztu zen:
Proiektuari jarraipena emateko, Elgoibar Ikastolak sustatuta eta Badihardugu, Elgoibarko Izarra, Ikastolen Elkartea eta Elgoibarko Udalarekin elkarlanean, Elgoibar Ikastolaren ibilbidea, memoria kolektiboa eta komunitatearen indarra jasotzen duen Elgoibar Ikastola, 1962tik gelak bizipenez betetzen dokumentala prestatu da 2025ean.
