Antton Azpiazu Kaltzakorta

Elgoibarren jaioa, 1956an. Aita elgoibartarra zuen eta ama ere bertan hazitakoa, nahiz eta familia Etxebarritik etorria izan. Eskola nazionalean urtebete egin ostean, Pilar ikastetxeko San Viatorreko fraideekin ikasi zuen. Ikasketa guztiak gaztelaniaz egin arren, umetan euskara-eskola batzuk ere jaso zituen Felix Etxeberria eta Jesus Larrañagarekin. Aita, Anton Azpiazu, oso euskaltzalea eta kultura zalea zen eta gaitasun handia zuen musikarako. 1965ean txistua eta solfeoa irakasten hasi zen etxean bertan eta Anttonek ere umetan ikasi zuen. Gazte-alaiak txistu taldeko kide izan zen Antton eta Udal txistulari banda ere sortu zuten. Hainbat ekitaldi eta dantza-saiotan jo izan du urte askoan (Euskal Jaiak, Dantzari txiki egunak...), herriko dantzariei laguntzen. Aita hil zenean, berak hartu zuen txistu-eskolaren ardura zenbait urtez. 1970 inguruan Udal Musika Bandan sartu zen eta baita Mausitxa txarangan ere, handik urtebetera. Gaztetan "Juventud elgoibarresa" taldean ibili zen eta, besteak beste, euskara eta kultura bultzatzeko hainbat ekimen bideratu zituzten: euskal kantarien kantaldiak, "Diálogos para la juventud" aldizkaria, danborrada... Urte asko egin zituen Juan Mugerza krosaren antolaketan ere.