Egitasmo hau 2007. urtean ipini zuen martxan Ermuko Euskal Birusa Kultur Elkarteak, beti ere elkartearen xede nagusiari jarraiki: euskara herritarrei eta herritarren euskara herrira itzultzeko ahaleginetan. Irudi eta ahots grabaketa digitalen bidez, Ermuan jaio edo bizi diren adineko hainbat pertsonen bizipenen haritik, gerrate aurreko eta haren osteko Ermuaren idatzi gabeko historia, ohitura, sinesmen eta eguneroko bizimodua jasotzen ari da. Hiztunetako hainbat ez dira ermuarrak jaiotzez, inguruko herrietatik etorritakoak baizik.
