Jaurrieta

Jaurrieta (Eaurta euskal hiztunen ahotan) Zaraitzuko udalerria da, haranaren ipar-mendebaldean dagoena, Otsagitik 8 kmra. Mendebaldetik, Aezkoako Abaurregainekin egiten du muga. Iratiko basoa hurbil-hurbil dauka. 912 metroko garaieran dago. Hazitarako patata, abeltzaintza eta basoa dira bizibide nagusiak, nahiz eta gaur egun bigarren eta hirugarren sektoreek ere pisu handia izan. Jaurrietakoak izan dira Zaraitzuko azken euskaldunak. Dagoeneko ez da gelditzen euskaldun zaharrik, azkenak duela gutxi hil baitziren. Nahiz eta Abaurregaina oso hurbil izan, Aezkoako euskarari oso ezberdina iritzi izan diote jaurrietarrek.