Luixita Zabala Beristain

Errenteria-Oreretako Gaztaino auzoan pasa zituen Luixitak haurtzaroa eta gaztaroa, Lezon jaio zen arren. Bera jaio eta berehala joan zen familia osoa Errenteria-Oreretara bizitzera. Ama Azkoitikoa zuen eta aita, berriz, Aranokoa. Sei anai-arrebatan zaharrena zen bera eta oso gaztetxo zirela hil zitzaien ama. Aita okina zen: Garmendia okindegian aritu zen lanean lehendabizi eta Villarrealen geroago. Gaztainoko harrobi-gain etxean bizitu ziren. Hamabi urterekin eskola utzi eta umezain aritu zen hasieran; gerora Niessen lantegian hasi zen lanean, hamalau urterekin. Hamabost urterekin ezagutu zuen lantegian lehenengo greba. Artean ez zituen gertaera haien nondik norakoak ulertzen. Gerora, hogeita hiru urterekin emakumeen sekzioko langileen ordezkari izan zen. Hamalau urtez egin zuen lan Niessenen, ezkondu zen arte. Ezkondu aurretik behartu egin zuten lana uztera. Pasai Donibaneko Joxe Mari Karrererekin ezkondu eta Galtzaraborda auzoan jarri ziren bizitzen. Sei seme-alaba izan zituzten eta geroztik han bizi izan dira.