Valentina Yeregi Inza

Aita Villabonakoa zuen eta ama, berriz, Urnietakoa. Lasarten jaio zen bera eta eskola nazionalean ibili zen hamar urte bete eta jaunartzea egin zuen arte. Orduan, Errekaldera joan zen bere ahizparen etxera, haren haurrei kontu egitera eta laguntzera. Hamasei urte egin zituen arte egon zen haiekin eta Donostiako San Martinen zegoen etxe batean sartu zen gero neskame. Hogei urterekin noizbait ezkontzeko asmoa bazuela-eta, josten ikasi nahi izan zuen eta Lasartera itzuli zen. Ordurako bazebilen gero senar izango zuen gizonarekin eta, Gerrak ezkondu aurretik harrapatu bazituen ere, aitak berarekin alde egiten utzi zion. Aurrena Loiolara, gero Bilbora, handik Ortuellara, gero Santanderrera, Santanderretik Frantziara eta handik Biarritzera; hiruzpalau urtez alde batetik bestera ihesi ibili ziren. Ortuellan zibilez ezkontzea erabaki zuten eta gizona miliziano zebilela eskua moztuta utzi zuten berehala. Ospitaletik ospitalera mugitu zen gizona, eta beren lehen semea Frantzian jaio zen. Itzultzea erabaki zutenean, Lasarten atera zuten bizimodua nola edo hala. Itzultzean bigarren aldiz ezkondu ziren, elizaz eta "behar zen bezala".