Jose Angel Irigarai Imaz

Iruñean jaio zen, baina Donostiako Gros auzora joan ziren bizitzera bost urte inguru zituenean. Artean mutikoa zela hil zitzaion ama; donostiarra zen. Aita, berriz, nafarra: Beran jaiotako auriztarra; medikua eta idazlea zen Aingeru Irigarai, haren aita Fermin Irigarai "Larreko" bezalaxe. Bide bera jarraitu zuen Jose Angelek ere: La Sallen batxilergoa ikasi ostean, Iruñera joan zen Medikuntza egitera. Donostiako Contadores lantegiko medikua izan zen urte askoan. Baina kulturgintzan egin duen lanarengatik da ezagunagoa. Batez ere poesia idatzi du, baita narrazioak, abestiak eta saiakerak ere. Gainera, makina bat elkarte eta ekimenetan parte hartu du: Ez Dok Amairu, Aranzadi zientzia elkartea, Nafarroako ikastolak, Eusko Ikaskuntza, Bilboko Kafe Antzokia... Oteiza fundazioko kidea da, Pamiela argitaletxeko editorea eta ohorezko euskaltzaina. Nafarreraz hitz egiten du, etxean ikasitako euskara.