Bixente Atorrasagasti Gartziarena

Feria egun batean bi baserritarren artean sortutako adiskidetasuna tarteko etorri omen zen XIX. mendearen hondarrean Bixenteren aitona, Antonio Atorrasagasti, Sorabillako Lakaetxe baserritik Martuteneko Larrañategira lanera. Handik urteetara etxeko alaba Apolinar Zamorarekin ezkondu zen; Agirretolare baserrian bizitzen jarri, eta laster etxea erosi ahal izan zuten. Ordurako sagardogintzarekin lotutako baserriaren garairik oparoenak amaituak izango baziren ere, ez da harritzekoa gerora ogibidea bilakatuko zen upelgintza eta, oro har, arotzeria nola-hala ikasi izana. Hiru semeek eman zioten segida lanbideari, baita Antonioren biloba Bixente Atorrasagastik ere. Lanbide horretan aritu zen harik eta 32 urte bete zituen arte. Orduan arotzeria utzi eta eraikuntzan jardun zuen, erretreta hartu arte. Halere, upelak nola egin eta berritzen zituzten ez zaiola ahaztu erakutsi zigun.