Axen Egaña Santamaria

Bilbon jaio zen, gerrak hartaratuta. Ama Donostiakoa zuen, eta aita Mutrikukoa; itsasoan zegoen hura, Terranovan. Bilbotik Bartzelonara eta handik Donibane Lohizunera joan ziren. Beste aldera pasatzen saiatu zen batean, ama hil egin zuten, mugan. Senitartekoekin bizi izan zen; eskolan eta kalean dena frantsesez egiten zuen, eta euskararik ez zuen ikasi. Pasai Donibanera joan zen 13 urterekin, aitarengana. Berriz ezkondu zen aita, eta Donostiara joan ziren bizitzera, Parte Zaharrera lehenengo eta Herrerara gero. Elizaranen ibili zen mojekin, eta ondoren Parron akademian idazkari izateko ikasi zuen. Josten ere ibili zen, Herreran. "Industrias Españolas" lantegian egin zuen lana, “Contadores” bezala ezagunagoa. 1962an Iñaki Beobiderekin ezkondu zen, eta sei seme-alaba dituzte. Jarrai antzerki taldean ibili ziren biak, eta Ez dok Amairuren diskoak banatzen ere bai. Euskal Dantzarien Biltzarreko idazkari ere izan da urte askoan. 45 urteren ondoren antzerkia egiten hasi zen berriro duela urte pare bat: “Amamaren memoria” antzezlana.