Felix Zubia Arana

Udala auzoko Garaikotxiki baserrian jaio zen, hamaika anai-arrebatatik seigarrena. Aita bertakoa zen, eta ama, berriz, Elorrioko Iguria auzoko Ibarluze baserrikoa. Amak petrikilo osaketa xumeak egiten zituen (bihurrituak, erasanak, etab.) Gerra denboran Bizkaiko Atxondo herriko Arrazola elizatera lehenengo, eta Elorrioko amaren jaiotetxera geroago, babes bila joan zen familia, ganadu eta guzti. Auzoko eskolan ikasi zuen sei urtetik hamalaura arte. Eskolara joan aurretik, egunero kalera esnea eraman eta handik ogia ekartzen zuen. 24 urtera arte etxean jardun zuen, baina baserritik bizimodua atera ezin, eta ezkondu zenean Aranzabal lantegian hasi zen lanean, giltzarrapoak egiten. Bertatik hartu zuen erretiroa. Oñatiko Orbea txokolate lantegiko nagusientzako neskame lanean ziharduen Dionisia Murgiondo Anatxe baserriko zegamarrarekin ezkondu zen. Hiru seme-alaba dituzte.