Resurreccion Gallastegi Galartza

Soraluzen jaio zen, Daniel Mujikaren gozo-denda gainean. Aita osintxuarra eta ama arabarra zituen. Lau anai-arreba izan ziren. Mesedeetako mojen (mercedarias) eskolan ikasi zuen hamabi urtera arte. Hiru urterekin ikasi zuen irakurtzen. Berak bi urte zituela aita hil zitzaion, eta ama berriro ezkondu zen Gabriel Serafinoff Apple-ekin, Errusian jaio eta Frantzian hazitakoa zena. Hamabi urterekin Donostiara joan ziren eta “Librería de Gros” izan zuten ardurapean gerra hasi zen arte. Durangoko bonbardaketan bertan zegoen Resu. Gerra denboran Frantzian eta Espainian zehar ibili ziren ihesi. Anaia bat Asturiasen eta aita “Brigadas Internacionales”etan Valentziako frontean galdu zituen. Gerratik itzulita, “La Tiendita” modura ezagutu zen denda txiki bat jarri zuten Soraluzen. Alberdi ganibet lantegian hasi zen lanean. Gero kanoi lantegian jardun zuen ezkondu zen arte. Bi alaba ditu. Oso irakurle, zinemazale eta bidaiaria da.