Felipe Uriarte Camara

Donibaneko Camara etxean jaioa, bere ama Angelita bertakoa zen, Camara jatetxeko nagusiaren alaba. Jatetxean egiten zuen lana. Aita, berriz, Galdakaokoa, PYSBEra joana lanera; arrantzalea, Galerna bakailao-ontzian ibiltzen zen. Bost senide ziren. Felipek sei urte zituela, familia Galiziara joan zen bizitzera. Aitak Copiva enpresan aurkitu zuen lana, bakailao-ontziak prestatzen. Udan bi hilabete igarotzen zituzten Donibanen; amak eta senide zaharrenek jatetxean egiten zuten lana eta ume txikienak Lete baserrira bidaltzen zituzten. 19 urte zituenean familia Donibanera bueltatu zen. Gurasoak Camara jatetxearen jabe bakar bihurtu ziren (anai-arrebei beraien zatia erosita) eta familiako negozioan lana egitea egokitu zitzaien seme-alaba guztiei. Felipek Ingeniaritza ikasi zuen Donostian. Eskalatzen eta mendi irteerak egiten ere hasi zen. 24 urterekin motxila hartu, eta Frantzia aldera joan zen bizitzera, Chamonixera; han zegoela, Cervino mendiaren gailurra egiteko aukera izan zuen. 1974an Everesterako lehen euskal espedizioan (Tximist espedizioan) hartu zuen parte. 1830 metrora iritsi zen, Migel Rosenekin batera. 1980an Everesterako bigarren euskal espedizioan ere hartu zuen parte; orduan Martin Zabaleta gailurrera iritsi zen. 1981ean Euskaldunak Everest mendian, Buru ilun lurruntsua liburua idatzi zuen. Hainbat komunikabidetan idatzi izan du. Mendi gidarien Mendiak eta Herriak elkarteko sortzaile eta buru da. Euskaltzalea, euskara galdu, berreskuratu eta sutsuki defendatu duena.