Miren Iraola Billar Txapa

Eibarren jaio zen, ama hangoa zelako, baina Oñatin bizi izan da beti. Lehenengo, Kale Zaharrean eta gero Moyua kalean. Hiru senide ziren. Aita tornularia zen, eta etxean negozioa ere jarri zuten: El Leon garagardoak partitzen zituzten; sifoiak eta gaseosa ere egiten zuten. Umetan poxpolinetan ibili zen Miren, Batzokiko dantza taldean. Ospitaleko eskolara joaten zen, mojetara. Gerra hasi zenean, ahizpak eta biek Lekeitiora egin zuten ihes. "Habana" ontzian Erresuma Batura eraman zituzten gero. Bi urtetik gora egin zuten ama eta anaia ikusi gabe. Aita kartzelan egon zen. Josten ikasi zuen Mirenek; etxeko negozioan ere jardun zuen. Arrasateko batekin ezkondu zen, eta hiru seme-alaba izan zituzten.