Antonio Mardaras Arrieta

1922. urtean jaio zen Jatabeko Utxondo baserrian. Gurasoak Jatabekoak zituen: ama Zabalerrota baserrikoa eta aita Olagoitikoa. Sei neba-arrebatan bigarrena izan zen eta etxeko nagusienetarikoa izanda, eskolara joan baino lan asko egin behar izan zuen. Hamar urterekin, okin lanetan ibili zen etxerik etxe ogia asto gainean eramaten. Oso memoria ona zuen eta hiru pezeta irabazten zituela kontatzeaz gain, astoarekin gertatutako istorio asko kontatu zizkigun barre artean. Hamalau urte zituela, gerra hasi zen eta oso ondo deskribatu zigun bere etxe gainetik igaro zirenean abioiak tiroka hasi ziren momentu hori. Abioiean idatzita agertzen ziren letrak gogoratzen zituen oraindik ere. Hamazortzi urterekin soldadu bezala eraman zuten. Handik bueltatu zenean, Mungialdeko enpresa batean lanean hasi zen eta beste antzeko enpresa batzuetatik igaro ostean, 1951an, Arteche enpresan hartu zuten. Ia 20 urtez bertan egon ondoren erretiratu egin zen. 25 urte zituela, Mungian bizi zen Armintzako neska bat ezagutu zuen eta hiru urtez bikote moduan egon ondoren, 28 urterekin ezkondu eta andrearen etxea zen, Mungiako Atxuri auzoan dagoen Estretza baserrira joan zen bizitzen. Bertan, lau seme-alaba izan zituzten.