Martzelino Legorburu Manterola Argiñene

Martzelino bertsolaria da,"Argiñene" goitizenekoa, Gaintxurizketagoikoa bailarako Argiñene baserrian jaio zen eta bertan bizi izan da beti. Aita Argiñenekoa zen, ama berriz alboko baserri batekoa. Zortzi urtetarako behiak jezten erakutsi zion aitonak, segan ere aritzen zen haurra zela. Gutxi ibili zen eskolan, arratsaldez joaten ziren mutilak eskolara, goizez neskak. Zenbaitetan baserrian lana bazegoen, amak lanean gelditzeko esaten zion. Gazteleraz izaten zen eskola baina dotrina euskaraz ikasi zuen. Eskola bukatuta baserriko lanetan aritu zen, hori zuen bere lana. Senideak artazuriketan ganbaran biltzen zirenean berriketan eta kantuan aritzen ziren, bertso zaharrak kantatzen askotan. Beharbada hortik datorkio Martzelinori bertsotan egiteko afizioa, behin baino gehiagotan aritu da jendaurrean kantari eta bertso-paperetan ere sorta ugari ditu eginak. Gaztetako igandetako bilerak eta dantzaldiak bukatuta, neska-laguntzatik bueltatuta, koadrila berriz elkartu eta Irungo Landetxa auzoko Larrea tabernan aritzen ziren bertsotan. Ezkondu eta gero Niessen fabrikan hasi zen lanean, Errenteria-Oreretan. Baserriko lanarekin tartekatu zuen fabrikakoa jubilatu arte. Bi alaba izan zituen. Denbora librean, baserriko tresnak egiten zituen miniaturan baita meta txikiak ere. Oiartzungo Karrikako bertso-eskolan ibilitakoa da.