Gaspar Lintzoain Lintzoain

Eugin jaioa, Aragon bordan. Bi gurasoak Iragikoak zituen; aita oihaneko lanetan eta ikazkin ibilia, eta ama bordaria, etxeko lanetan aritzen zena. Mendi aldean bizi izan zirenez, borda (baserri) batean, Iragiko euskaraz mintzatzen da, baina, era berean, Eugikoaren ezaugarriak oso ongi ezagutzen ditu. 9 seme-alabetan (emakumezko bakarra) seigarrena da. 14 urtetan Iragira lanera joaten hasi zen, han Errekaldia etxea (kale-baserria) erosi baitzuten, eta bien martxa eraman beharra zegoen: aziendak eta abar. 15 urtetan itzain hasi zen, median zur-lote bat ateratzen. Iragira ezkondu zen, Zaldaitzenea etxera, han hartu baitzuen emaztea; egun, Etxeberrin bizi da eta lau seme-alaba ditu. Oso euskaltzalea, euskaraz erakutsi die seme-alabei eta sei ilobei. Kontalari ona. Egindako elkarrizketetako batean tarteka Marijose alaba azaltzen da.