Ahotsak Wikipedian
Ahotsak-eko materiala euskarazko Wikipedian.
Badihardugu Euskara Elkarteak eta Euskarazko Wikipediak 2018ko maiatzean izenpetutako hitzarmenari esker, Euskal Herriko Ahotsak proiektuko 300 bideo igo ditugu Euskarazko Wikipedira, Euskal Herriko ahalik eta herri gehienetako euskarazko testigantzak euskarazko entziklopedia librean eskaintzeko asmoz.
Akordio honi esker, herrian herriko pasarte onenak identifikatu eta Wikipediara igoko ditugu; euskalkien ezaugarriak ere jarriko ditugu. Irati Lizeaga izango da wikilari egoiliarra, eta abendua bitarte ibiliko da langintza horretan.
Wikipedian kehendik ere bazeuden gure bideo pasarte batzuk, beste wikilari batzuek txertatutakoak, baina hitzarmen berriari esker bi proiektuen arteko lankidetza sendotu eta egonkortu egingo da. Azken batean, Euskal Herriko ondarea eta euskarak duen aberastasuna zabaltzea baita bion helburua.
Wikipediako Galder Gonzalezen esanetan, Ahotsak.eus "altxorra da, benetako altxorra: milaka pertsona horiek euren pasarteak aipatzeak garrantzi berezia du etorkizunerako. Alde batetik euskararen aldaerak, esamoldeak eta moduak jasotzen direlako; bestetik, pertsona horien testigantzek herriaren historia eraikitzen laguntzen digutelako".
Hitzarmenari buruzko albisteak: Wikipedian eta gure albistegian.
