Ea

Busturialdeko eskualdearen ipar-ekialdean dago. Iparraldetik itsasoak mugatzen du; hegoaldetik, Ereñok; hego-ekialdetik Ispasterrek, eta mendebaldetik Ibarrangeluk. Kostaldeak hego-ekialderako ibilbidea egiten du eta altuera handia dauka. Barnealdea ere haran sakonez eta hegal aldapatsuz osatutako eremu malkartsua da. Udalerriak beste bi auzo ditu: Natxitua eta Bedarona. Natxitua inguru malkartsuan dago eta Bedarona itsasoaren gainetik ikusten den muino batean dago, itsas-mailaren gainetik 150 metrotara. Angelutxu herrigunea, berriz, Ea eta Natxitua artean kokatutako baserri-multzo txiki bat da. Antzina, Eako herritar gehienak arrantzan aritzen ziren; hori dela-eta, ibaia itsasoratzen den gunean portu txiki bat zeukaten eta eskabetxe-industria bat sortu zuten esekitoki eta gazitegiekin. Ibaiak bitan zatitzen zuen herria; zati horietako bat Bedaronako elizatearen lurretan zegoen eta bestea Natxituako elizatean. XIX. mendean egoera aldatu egin zen eta Eako portuak bi elizateek baino botere eta biztanle gehiago lortu zituen. Ondorioz, Bedaronako eta Natxituako udalak batu egin ziren, udalerri berriari Ea izena jarri zioten eta udalaren erdigunea Eako portua izango zela erabaki zuten. Bertakoek herriari "Ie" deitzen diote.

Argazkia: Euskalduna