Biriatu

Biriatu Lapurdiko udalerria da, Hendaiako kantonamenduan kokatua dagoena. 1603. urtean herri egin zen, Urruñatik bereizi ondoan. Bidasoa ibaiak Lapurdi, Gipuzkoa, eta Nafarroaren arteko muga marrazten du Biriatun. Bertako euskalkian nahasketa nabaritzen da. Kontrabando handia izan da bertan XX. mendean zehar, eta Bigarren Mundu Gerran errefuxiatu askorentzat pasabidea. Xoldokogaina da bertako mendi nagusia, eta oihan zabala ere dago Biriatun.