Mariasun Elizalde Elizalde

Ezkonduz geroztik, Maria A. Arriada. Gurasoak Amaiurren sortuak ziren eta Arizkunera joan ziren bizitzera. Aita txistulari famatua zen: Mauricio Elizalde. Sei senidetan hirugarrena, Arizkungo eskolan ibili zen eta 11 urterekin Frantziara joan zen moja ikastetxe batera, frantsesa ikastera; Zaragozan beste bi urte egin zituen, moja horiekin. 16 urterekin Elizondoko Baztan hotelean aritu zen, gelak garbitzen, eta ia hamar urte eman zituen hoteleko familiaren haurrak zaintzen: Elizondon, Valladoliden eta Madrilen. Jesus Arriada (Ameriketan bizi zen, artzain joana, eta bisitan zegoen Arizkunen; bertsolaria zen) ezagutu eta karta bidez aritu ostean, ezkondu eta Ameriketara joan ziren bizitzera. Alaba bat izan zuten, Arantxa. Mariasunek San Franciscoko euskal etxea garbitzen egin du lana 33 urtean.