Udane Juaristi Ibañez

Udane Juaristi azkoitiar margolaria da. Txiki-txikitatik izan du eskulanak egiteko, marrazteko eta legoekin jolasteko grina. Arte Ederretan lizentziatua da eta Azkoitian tailer bat dauka. Argazkietan oinarrituta, collage bidezko obrak sortzen ditu, bereziki hiri-paisaiak, Udatxo gaitzizenarekin. Muralak ere egiten ditu, eta bere horma-irudietako bat munduko ehun onenetakoen artean aukeratu zuten. Beste hainbat proiektutan ere parte hartu izan du, esaterako, 2013an Euskal Herriko eszenatokietan aritu zen margotzen "Gazta zati bat" proiektuarekin eta 2017an Xabi Solano musikariaren CDa diseinatu zuen. 2024an, berriz, 59. Durangoko azokako kartela diseinatu zuen.