Jon Aizpurua Barandiaran

San Martin auzoko Zaindi etxean jaioa, eliza ondoan. Lau anaietan gazteena. Ama ataundarra zuten, Aitzio Goiko baserrikoa, eta aitaren familia Abaltzisketatik Ataunera bizitzera joandakoa zen; aitak CAFen egiten zuen lana (arrantzale ere ibilia zen). Umetan moja ikastetxera joan zen eta gero eskola nazionaletara. Gero fraidekume, Lizarrako eskolapioetara. Ordiziako akademian eta Beasaingo institutuan ere ibili zen. Segurako futbol taldekoa izan zen. Euskalgintzan hasi zen lanean: itzulpenak egiten eta Goierriko euskal eskolan irakasle. EiTB sortu zenean, hartarako prestatu, eta bertan hasi zen: lehenengo telebistan eta ondoren Euskadi Irratiko esataria izan da urtetan. Jexux anaiarekin batera elkarrizketatu genuen, batez ere Joxe Migel Barandiaranen kontuak jasotzeko (liburua idatzi zuten elkarlanean, hari buruz). Jeltilbaratza elkarteko sortzaileetako bat da, "Jentilen etorrera" antzezlaneko gidoilaria, eta mitologiarekin lotutako elkarrizketa ere egin genion.