Felixi Tapia Amenabar

Asteasuko goi goian jaio zen Errotarrieta izeneko baserrian. Aita zuen bertakoa eta ama, berriz, Etxebitarte izeneko baserrikoa. Hamabost senide ziren eta bera seigarrena zen. Atzetik beste bederatzi etorri ziren eta ume zaintzen ederki ikasi zuen. Hamar urte pasatxo zituela Mintegi izeneko baserrira joan ziren bizitzera. Hogeita bat urterekin Donostiara neskame joan bazen ere (La Perla pentsiora) lehenago ere Bretxan ibilia zen esne partitzen. Mitxelin fabrikan lanean zebilela ezkondu zen. Senarra Larraulgoa zuen eta Asteasun ezkondu baziren ere, Lasarte-Orian bizi izan da ezkonduz geroztik.