Axun Izagirre Biurrarena

Aranon jaio zen, Askatsu baserrian. Sei senide izan ziren eta bera izan zen neska bakarra. Aita bera oso txikia zela hil zitzaien baina etxean jende asko bizi zela du gogoan. Pagoako eskolan ibili zen eta zentralean lan egiten zutenen seme-alabei hala tokatzen zitzaielako, Santioko ermitan jaten ematen zieten beraiei, beste batzuekin batera. Apaizak eguerditan film mutuak ere jartzen zizkiela gogoratzen du eta doktrina erakusteko ere hartzen zuten denbora berriro eskolara itzuli baino lehen. Josten ikasten ere ibili zen eta hogeita bost urterekin Hernanira ezkondu zen. Geroztik hantxe bizi izan da, 2007an Donostiara joan zen arte.