Josefina Lete Larrañaga

Antzuolako Elektrika etxean jaio zen. Aita bertakoa zen eta ama, berriz, Polleruenekua. Antzuolako eskola publikoan ikasi zuen hamalau urtera arte, eta gero urte pare batez kontabilitatea ikasi zuen Bergaran. Elektrika etxearen ondoan, zentral elektrikoaz gain zerratokia ere bazuten, aitak kudeatzen zuena. Baserritarrek gurdietan ekartzen zuten egurra, eta zerran ebaki eta gero, inguruetako herrietan saltzen zuen aitak. Josefinak zerrategian egin zuen lan hamabost urte zituenetik ezkondu zen arte. Antzuolako Amezkoanekoa etxera ezkondu zen, bertako Gregorio Madariaga harakinarekin. Ordutik aurrera, sei seme-alaba hazteaz gain, txorizoak eta odolkiak egin eta dendan laguntzen zuen. Arrandegia jarri zuten gero, eta Josefina kalez kale orgarekin ibiltzen zen arraina saltzen. Arrandegia kendu eta fruta-denda izan zuten bi urtez.