San Joan sua pizteko prest?

2014ko eka. 23a, 10:09

Ikasturtearen azken txinpartekin batera etorri ohi da San Joan bezpera. Zer egiten duzue zure herrian? Suaren gainetik salto? Apunteak erre? Abesten al duzue? Lehen ere berdina zen ala aldatuz joan da? Bideo labur bat prestatu dugu ohitura eder honen inguruan. Gauerako girotzen hasi nahi baduzu: 



Lau minutu eta erdiko bideoa da, Bizkaiko eta Gipuzkoako zortzi lekukotzaz osatua. Eta ikasgelan.ahotsak.com webgunean jarri dugu, hezitzaile guztion eskura, ikasleekin ohitura horri buruz hausnartzeko. Hainbat herritan proiektu pilotoak dauzkagu, ahozko ondarea ikasgeletara eramateko (Eskoriatza, Aretxabaleta, Eibar, Arrasate eta Lekeitio), eta herri horietako ikastetxe batzuetan bazuten bideoa erabiltzeko asmoa. Kontatuko digute ea zein lanketa egin duten! Gainerako irakasleontzat aurten jada berandutxo da, ikasturtea amaitu da eta. Baina bideoa hortxe egongo da datorren urterako ere. Erabil ezazue!

Webgunean, bideoarekin batera transkripzioa dator, eta baita beste bi atal ere. Proposamenetan, bideoarekin zein lanketa egin daitekeen aipatzen dugu, eta informazio osagarrian, berriz, ohitura horri buruzko hainbat xehetasun ematen ditugu. Fitxa osatzeko iradokizunik baldin baduzue, edo zuek ikasgelan egingo zenuketen lanketa kontatu nahi badiguzue, jarri gurekin harremanetan. Denon artean egingo dugu bidea. Gora San Joan!