"Oñatiko hika poltsikaran" liburuxka argitaratu berri dugu

aza. 3, 2020, 4:21 p.m.

Ingo Xonau! proiektuaren barruan, Oñatiko hika ikasteko oinarrizko informazioa eta aditz-taulak batzen dituen liburuxka plazaratu dugu, poltsikoan eramateko modukoa. 

Ingo xonau! proiektuaren asmoa Oñatiko noka biziberritzea da, eta, horretarako, "Oñatiko hika poltsikaran" liburuxka prestatu eta plazaratu berri dugu. Bertan, Oñatiko hitanoari buruzko oinarrizko informazioa eta aditz-taulak datoz. Hemendik aurrera, ez dago aitzakiarik hika ez jarduteko!

Liburuxka txikia da, hamar zentimetro luzeran zein zabaleran, baina mimo handiz egindakoa. Badihardugu euskara elkarteko Idoia Etxeberriak prestatu du, Roberto Altuna euskaltegiko irakaslearen laguntzarekin, eta Mirari Sagarzazu marrazkilariak egin ditu diseinua eta ilustrazioak. 32 orri ditu guztira. Batetik, hitanoari buruzko argibideak eta informazio orokorra datoz eta, bestetik, aditz-taulak: adizki nagusiak eta aditz trinkoak. 

Liburuxkaren 2.000 ale atera ditugu, eta Oñatiko udal euskaltegian daude eskuragarri. Hikalagunen artean, hika ikastaroetan eta ikastetxeetan ere banatuko ditugu. Hikalaguna martxan dago, nahiz eta COVID19ak egoera dezente zaildu, eta azaroaren 10ean emakumeendako hika ikastaroa hasiko da, Oñatiko Jabetze Eskolan (oraindik izena emateko aukera dago!). Liburuxkaren bertsio digitala euskaltegiko webgunean eta Badihardugu elkartearen webgunean ere eskuratu ahal izango da. 

Liburuxkaz gainera, Kontzejupetik herri aldizkariaren azaroko alearekin batera "Oñatiko hikaren txuletia" banatu dugu, Oñatiko etxe guztietara: 5.000 aletik gora. Bertan hitanoko aditz trinkoak eta adizki nagusiak batu ditugu, gehien erabiltzen direnak. Liburuxkaren bertsio laburra izango litzateke, nolabait esateko. Hori ere neurri txikikoa da (A6), poltsan edo poltsikoan erraz eramateko modukoa.

Oñatin emakumeen hika galtzeko arriskuan dagoela ikusita, hitanoa biziberritzeko proiektua sortu zen iaz, Oñatiko Udalaren babesari eskerIngo xonau! Badihardugu euskara elkarteko kideok hartu genuen proiektuaren gidaritza, herriko hainbat eragilerekin elkarlanean. Iaz 54 herritar elkarrizketatu genituen (gehienak emakumeak), eta ondoren grabazioak lantzen eta sareratzen joan gara: Ahotsak-en ikus ditzakezue. 

Jasotako testigantzekin lau ikus-entzunezko ere prestatu ditugu:

Argazkian: liburuxkaren azala.

 

Iruzkindu

Erantzuna emateko, sartu ahotsak.eus-eko komunitatera.

Gipuzkoako aldundia Kutxa Eusko Jaularitza Bizkaiko aldundia