HUHEZIko ikasleen sekuentzia didaktikoa, ahotsak.com-eko testigantzekin

2014ko eka. 16a, 17:32

Gure aitona-amonen garaian, neskak eta mutilak aparte egoten ziren eskolan. Jolasak ere diferenteak zituzten. Ahotsak.com-en hainbat testigantza ditugu jasota horri buruz. Maider Esnaola eta Garazi Eizagirre Magisteritzako ikasleek genero rolei buruz hausnartzeko erabili dituzte. Sekuentzia didaktiko bat prestatu dute, Lehen Hezkuntzako 3. ziklorako, eta ikasgelan.ahotsak.com webgunean jarri dugu, hezitzaile ororen eskura.

Bideo bat da sekuentziaren oinarria: hiru minutu pasatxoko bideoa. Bertan, hamaika lekukok hartzen dute hitza, sasoi bateko egoera azaltzeko. Webgunean, bideoaren azpian transkripzioa dator, eta "Proposamenak" atalean, berriz, sekuentzia didaktikoa.

Joan zen astean aurkeztu zuten lana, Eskoriatzan, HUHEZIn bertan. Natura, gizartea eta kultura ingurunearen ezaguera ikasgaian lantzeko moduko sekuentzia da. Lehenaldia abiapuntu moduan hartuta, gaur egungo egoera aztertzea du helburu: egunerokoan ikastetxean gertatzen diren genero ezberdintasunez ohartzea, jolas-garaian erabiltzen dituzten espazioen antolaketa kasu. Eta gero, behin genero ezberdintasunez jabetuta, irtenbideak topatzea.

Iaz HUHEZIra joateko gonbidapena jaso genuen. Ahotsak.com zer den azaltzera joan ginen, eta hezkuntzako gure proiektuaren berri ematera. Eta handik sortu da elkarlanerako aukera. Ikasleak beraiek jarri dira gurekin harremanetan. Kultura Ondarearen Azterketa ikasgaian sekuentzia didaktiko bat egin behar zuten, eta Jarduera Soziokulturalak ikasgaian, berriz, 60 orduko borondatezko lana, inguruko elkarteren batean. Bi ikasgaiak elkartu, eta sekuentzia didaktikoa ahozko ondarearekin lotuta egitea erabaki zuten.

Datorren ikasturtean Eizagirrek eta Esnaolak sekuentzia ikastetxeren batean probatzeko aukera izatea espero dute, eta horren arabera ere aldaketak egitea, hobetzen joatea. Hori bai, sekuentzia irakasle eta hezitzaile denen esku dago. Eta gure webguneko gainerako bideoak ere bai. Irakasleentzat erabilgarriak izatea da gure asmoa. Proposamenen bat baldin baduzu, badakizu! 

Argazkian, Garazi Eizagirre eta Maider Esnaola HUHEZIn euren lana aurkezten.