Janine Etiennette Maitia

Ezkonduz geroztik, lehenengo Auron eta gero Araneta. Ahatsan (NB) sortua, Tamundeya baserrian; ama bertakoa zuen eta aita Donazaharrekoa. Bi ahizpatan zaharrena. Haurrak zirelarik, aita Ameriketara joan zen artzain eta beraiek Baionara joan ziren bizitzera, amarekin; Baiona Ttipian joan ziren eskolara. Janinek 11 urte zituenean, aitarengana joan ziren, Bakersfieldera (Kalifornia). Aita Basque Cafe jatetxean zebilen lanean, kantinan, eta ama ere hantxe hasi zen gero, zerbitzari. Gurasoek Ameztoy jatetxea erosi zuten gero. Banku batean ibili zen lanean, lehenengo Bakersfielden, gero Chino eta gero berriro Bakersfielden. Robert Auron amerikarrarekin ezkondu zen eta hiru seme izan zituzten. Banandu zirelarik, Jose Aranetarekin ezkondu zen (Iruritakoa zen eta bi seme zituen). Bakersfieldeko euskal klubeko kide ziren. Arrantza eta ehiza maite zuten. Maddy ahizparekin batera elkarrizketatu genuen.