Enkarna Elosegi Benito

Beasainen jaio zen zazpi senideren artean lehenengo. Ama Debakoa zuen eta aita Amezketakoa, Fernando amezketarraren ahaidea. Aitak CAFen egiten zuen lan, baina 1931ko krisia iritsi zenean, Zarautzera joan behar izan zuen lanera. Familia osoa berekin eraman zuen. "Las chicas de la purpurina" deitzen zieten familiako ahizpei, aitaren lanari erreferentzia eginez. Herriko eskolan ikasi zuen, baina Errepublikako giroan erlijioa tratatzen zen modua ikusita, mojetara eraman zuten ikastera. Gerora, eskola partikularrak jasotzera bidali zuten, eta han ikasi zuen gehien Enkarnak. Kooperatiban errazionamenduko jeneroa kudeatzen egin zuen lan dozena bat urtean, baita ezkondu ostean ere. Egun batean, hala ere, lana uztea erabaki, eta kolpetik dedikatu zen seme-alaba eta etxeko lanetara. Emakume argia, bere familiaren jatorria ondo ezagutzen du, eta gogoan ditu errepublikan eta gerra zibilean gertatutakoak. Beasaindik etorri zirenetik, Zarautzen eman izan du bizi guztia eta sei seme-alaba izan ditu.