Maialen Chantre Irazoki

Beran jaio zen Maialen, eta bertan bizi izan da beti, ingurugiro zientziei lotutako ikasketak burutu bitartean Gasteizen egin zituen hiru urteak eta Erasmus beka batekin Kolonbian egin zuen beste urte bat izan ezik. Aita Berakoa du eta Zugarramurdikoa ama. Familia guztia bi herri horietan banatua du. Anaia bat du, bi urte gazteagoa. Patxi Castillo herritarrarekin batera elkarrizketatu dugu eta aisialdian euskararekin duten harremanari buruz hitz egiten dute, gehienbat: hizkera informala, hitanoa, guraso eta aiton-amonen hizkeraren transmisioa, inguruko herrietako hizkerak …

Ama Zugarramurdikoa izateak eragina izan du Maialenen bizitzan, eta modu batean bertakoa ere sentitzen da. Zugarramurdiko lagun eta familiakoekin mintzatzeko haien hizkera erabili ohi du, berea egina baitu, hein handi batean.

Ostalaritzan lanean aritu izan da. Beste hainbat zaletasunen artean, Berako dantza taldean ibili izan da Maialen, txikitatik. Egun, haurrei dantzan irakasten ere aritzen da.