Agur Patri Urkizu idazle eta ikertzaileari

2024ko abe. 18a, 16:03

Familia abertzale batean jaioa, Patri Urkizu Sarasuak (Lezo, 1946) eginahalak egin zituen euskara bizirik mantentzeko.  Idazlea zen (narrazioa, poesia, saiakera...) eta Idazleen Elkarteko zuzendari ere izan zen. Ikerlaria ere bazen, eta hainbat gairi buruzko ikerlanak egin zituen: antzerkia, literatura, bertsolaritza... euskal antzerkiari buruzko informazioa jasotzeko egin zion elkarrizketa Ahotsak.eus-eko Idoia Etxeberriak, eta gero literaturari buruzko beste bat ere bai, biak 2020. urtean. Aurretik ere elkarrizketatua zegoen, Lezoko hizkera jasotzeko. Gizon adeitsua, jakintsua eta eskuzabala, irribarre batekin hartzen zuen galdezka zetorrena. Gaur zendu da, 78 urterekin, gaixotasun luze baten ondoren. Hutsunea sentituko dugu. 

Lezotik kanpora ibili zen gaztetxotatik, baina ez zuen horregatik euskara alboratu. Lehenengo fraidegai bidali zuten, karmeldarrekin. Ondoren, Ingenieritza ikasten hasi zen Madrilen, eta bertan euskara irakasten ere bai. Euskal Filologia ikasi nahi zuela eta, Salamancara joan zen Filologia Erromanikoa ikastera, Koldo Mitxelena bertan zegoelako irakasle. Euskara batuaren sorrera prozesua gertutik bizi izan zuen. Peñaflorida institutuan egon zen irakasle, Donostian, eta ondoren UNEDen euskal gaiekin lotutako materiala sortzen. Lezoko alkate ere izan zen, trantsizioan.

Patri Urkizuri egindako elkarrizketetako 90 bideo pasarte baino gehiago daude ikusteko moduan. Bideo honetan, adibidez, idazten nola hasi zen kontatzen du:
 
Antzerki zaletasuna nondik zetorkion azaltzen du beste bideo pasarte honetan:
Patriren familiari eta lagunei gure doluminak eman nahi dizkiegu.