Markos Manterola Zulaika

Aiako Elkano auzoko Lertxundiberri baserrian jaio zen, 14 senideren artean 13.a; 2 senide, ordea, oso umetan hil ziren, haietako bat Markosen bikia. Baserrian lan asko egindakoa, oso ondo gogoratzen du orduko bizimodua. Eskolara joateko denbora gutxi izan zuen, eta gaztetatik hasi zen ebanista lanetan. Erretiroa hartu arte, krisialdi ugari ezagutu izan ditu, eta horregatik hainbatetan aldatu behar izan du lana; gaztetan Frantziara ere joan zen lan-baldintza hobeen bila, baina han desengainua izan eta ordutik Gipuzkoa inguruan aritu izan da lanean altzariak egiten. Bertsozalea umetatik, hainbat txapelketatan hartu izan du parte eta oraindik ere badu lagunekin elkartu eta bertsotan aritzeko ohitura. Ezkondu eta bi seme izan zituen. Kontalari argia eta memoria onekoa. Elkarrizketa egiterakoan, Zarautzen bizi zen.