Feli Uribe Alberdi

1928an jaio zen San Roke auzoko Bustintza baserrian. Aita bertakoa zuen eta ama Erandion jaiotakoa izan arren, Oromiñon (Iurreta) bizi zen. Gerra aurretik, batzokiko eskolara joan zen, euskaraz irakurtzen eta idazten ikasi zuten bertan. Gerra ostean, San Frantziskora joan zen. Durangoko bonbardaketa ostean, asto, behi eta guzti Karrantzara joan ziren trenez, eta handik, Torrelavegara. 90 durangar egon ziren bertako etxalde batean, tartean gerora bere senarra izango zena ere. Handik bueltatzerakoan, aita gorria izatearren kartzelatu zuten. Aita askatzeko, sasoi hartako 3.000 pezeta ordaindu zizkioten abokatu bati. Aske gelditu arren, ez zen Durangora etorri hiru urtetan salatu zuena ez enteratzeko, eta hiru urtez Olabeagan izan zuten aita. Bitarte horretan, ama behiekin Durangoko hondakinak kentzera derrigortu zuten. Urte askoan joan izan da Bilboko Erriberara porruak saltzera. Feli oso kantularia da txikitatik. Beti aritu izan da baserriko beharretan. Iñaki Azkuna, Bilboko alkatearen izekoa da. Senarra ere durangarra du. Bere lehengusina Isabel Agirrebeitia Uriberekin batera egin zitzaion elkarrizketa. Elkarrizketatzaileetako bat bere lehengusinaren semea da.